Contributed by ‘Upos ng Santelmo’

08:00am    Hangos. Takbo. Talon.
                        Hablutin ang time card, sa makinarya ibaon.
                        Eksato sa time in, kahit trapik sa daan.
                        Pagpasok sa opisina’y roon na rin ang almusalan.

08:30am    Make-up si ate. Pulbo’t gel kay kuya.
                        Limistick. Pamada.
                        Importante ang Postura.

09:00am    First task of the day, lamesa’y iligpit.
                        Siksik. Salansan. Patong. Ipit-ipit
                        Punit. Balungkos. Tapon sa Basura.
                        Bukas. Pasok. Labas. Isasara.

09:30am    Check ng Facebook. Mag-status, mag-share.
                        Basa-basa ng posts. One like, one prayer.
                        Twitter, Instagram, basa-basa ng email.
                        Online shopping. Price canvas. Uy, meron daw sale.

10:00          Okay, fight, for real, trabaho na,
                        Ipagpatuloy ang gawaing kahapo’y namañana.

10:30          Uy, coffee break. Kape. Tsika. Kape.
                        Kamusta si bunso? Si Tiya Nena? Si kumpare?

11:00          Uy! User, magtatanong ata, sana hindi,
                        shit lumalapit… Kailangang ngumiti.
                        “Yes, po? Opo. Doon po sa kabila.
                        Opo. Opo. Salamat po. Balik po sila”

11:30          Uy, lunchbreak na in thirty, mamya na ulit to,
                        Tigil muna sa paggawa, kailangang bantayan ang relo.

12:00          Tanghalian na wagas, ang tanggapa’y nakasara,
                        Hindi uso ang No Noon Break sa kumakalam na sikmura

1:00             Pagkakai’y nabusog, tara, siesta muna,
                        Ang gawaing nabinbing itutuloy na lang mamaya

1:30             Balik trabaho. Balik galaw. Bibusibusihan.
                        Kundi’y lagot sa review, kinsenas, katapusan.

3:00             Yosi break ulit. Kwentuhan sa labas.
                        Hangga’t may upos pa’y hindi makakatakas.

3:30             Habol, bilis, nang may maipakita,
                        Na sa maghapong paggawa’y may mahihita.
                        Shortcuts at iba pa wag pahalata,
                        Ano’t ano pa’y mahahabol din ang quota.

4:30             Pack-up, ligpit, handa nang umuwi.
                        Pasulyapsulyap sa relo, hindi na mapakali,

5:00             Pagpatak ng relo, gakidlat sa tulin,
                        Kailangang mauna, may pila sa machine,
                        Hablutin ang time card, sa makinarya ibaon,
                        Hangos. Takbo. Talon.

Paunawa : Ang mga tauhan at pangyayaring naisaad ay pawing mga kathang isip lamang. Ang anumang pagkakahalintulad sa tunay na pangyayari ay sadyang nakakapanlumong isipin kung totoo man.